Mayo

Mayo 1, 198x Adios, Adios, Adios, Adios, Adios, Adios! ang malakas na boses ng mga kantura sa tuklong. Hudyat na upang magtayuan at magpalitan ng puwesto ang mga ihadang dalaga't binata habang naglalakad papunta sa altar. Nagtayuan na din ang mga kantura sa dahilang nag umpukan ang mga bata sa harapan upang makita ang nagaganap na palitan. Bigla may sumingit sa mikropono at dinig na dinig sa amplifier."Inumin mo na yaang hinyebra mo at nang tayo'y makayao na. Nagsalita ang Mamay Kadyo sa Kuya Pilo sabay turo sa hawak na basong may lamang Gin. "Ay uo ga, may kalhati pang bote" patuloy ng Kuya Pilo. Pagkatapos noon ay sinaway ng Nanay Juana at sabing "bakin ga kayong ay di kumanta at patapos na. Mamaya na yang barek na iyan" Pero ang mga babaeng kantura ay ptuloy sa pagkanta at ang mga ihada naman ay patuloy sa ritual na pagpapaltan ng puwesto. "ay lintek na mga batang ito, magsialis kayo at di makita sa huli ang alay" sigaw ng matatanda na nasa may likod ng mga kantura. "Nanay, pop pa." ang sabi ng pamangkin kong si Emelie na halos ay kasabayin din namin ang edad nun. Siya ang passes namin para makalibre ng pop cola na libre at painom sa mga kantura. "siya, at are, ng matahimik ka na. asan ang kuya boyet mo?" ang tanong ng kakang ite sa apo. "nakainom na po, iniwan nga ako" pagsusumbong ni Emelie. "Ay boyet, pagliban ha, hintayin mo na kami." utos ng kakang ite."nasaan si ineng" "andun po sa una," sagot ni Toto, sumunod kong kapatid. "siya tawagin mo at maya maya'y uuwi na tayo"pagkasabi'y nakisabay na din sa nalalabing kanta ng kantura... Adios, Aaaaaaaaa-Diossss. Tapos ang unang araw ng alay. At pagkatapos ng 31 na araw pasukan na naman. Pero ito ang pinakamakulay na buwan para sa amin noon. Ang kabataang huling nakaranas ng walang ibang libangan at dibersyon sa buhay kundi ang pakikipagkapwa sa bawat kabaranggay. Ang aming kabataan na walang internet, computer, psp, playstation, wifi, wii at mall. Kungsaan mo makikita ang diwa ng pakikisama at ang simpleng buhay. Ito ang kuwento ng aming kabataan sa buwan ng Mayo..